ကော်ဖီဆိုင်ဖွင့်ပြီး ကိုယ်တိုင် စားပွဲထိုးဝင်လုပ်တဲ့ မြတ်ကေသီအောင်

သရုပ်ဆောင်မြတ်ကေသီအောင်ဟာ အခုဆိုရင် သူ့ရဲ့ မောင်လေးအရင်းနဲ့အတူ Coffee Lu Gallery ဆိုတဲ့ ကိုယ်ပိုင်ဆိုင်လေးကို မြောက်ဒဂုံမှာ ဖွင့်လှစ်ထားတယ်လို့ ဆိုရင်း ကော်ဖီဆိုင်လေးအကြောင်းကို Duwun Media ကနေပြောပြခဲ့ပါတယ်။

” စီးပွားရေးကလည်း မောင်လေးနဲ့ အတူတူဖွင့်တာပေါ့နော်၊ အခုက ပင်ပင်ပန်းပန်းကြီးလည်း မဟုတ်ပါဘူး။ ငွေကောင်တာလေး သွားထိုင် ပေးရုံပဲ။ ဒါပေမယ့်လေ မထင်ထားပဲနဲ့ ပရိသတ်တွေက အရမ်းလာကြတယ်၊ ငွေကောင်တာမှာလည်း ကိုယ်မထိုင်နိုင်တော့ဘဲနဲ့ စားပွဲထိုး အဆင့်ရောက်သွားရော။ စီးပွားရေးက ကိုယ်တစ်ယောက်တည်းလည်း လုပ်တာမဟုတ်ပါဘူး၊ ဘာပဲပြောပြော အနုပညာသမား ကတော့ ပရိသတ်နဲ့ ကင်းကွာလို့မရဘူးလေ။ ကိုယ့်ဘာသာကိုယ် ဘာကြီးပဲဖြစ်နေ ဖြစ်နေ၊ ကိုယ့်ဆိုင်မှာ လာစားသုံးတဲ့သူတွေလည်း တွေ့မှာပါ ဖော်ဖော်ရွေရွေနေတတ်တယ်၊ ချိုချိုသာသာပြောတတ်တယ်၊ သူတို့လာရင်လည်း ကျေးဇူးတင်ပါတယ်၊ သူတို့ ပြန်သွားရင်လည်း ကျေးဇူးတင်ပါတယ်လို့ပြောတယ်” လို့ ပရိသတ်တွေကြောင့် စားပွဲထိုးဖြစ်သွားရတဲ့အကြောင်းကို သဘောတကျ ပြောပြပါတယ်။

မြတ်ကေသီအောင်ဟာ သူ့ဆိုင်ကို လာအားပေးကြတဲ့ စားသုံးသူပရိသတ်တွေအတွက် ဆိုင်ရဲ့ ကောင်းခြင်း၊ ဆိုးခြင်းတွေကိုပိုင်ရှင်ပီသစွာ တာဝန်ယူဖြည့်ဆည်းပေးတတ်တယ်လို့ ဆိုပါတယ်။ သူ့ကို ချစ်လို့ လာရောက်အားပေးကြတဲ့ ပရိသတ်တွေရှိတာကြောင့်လည်း ဝမ်းသာရပါတယ်တဲ့။

” ဘာလိုအပ်ပါသလဲ၊ လိုအပ်တာရှိရင် အစ်မကိုယ်တိုင်ပြင်ပေးပါ့မယ်လို့ ပြောတယ်။ ဒါမျိုးဆိုတာက မင်းသမီးတစ်ယောက်အနေနဲ့ ပြောဖို့ အင်မတန်ခက်ခဲလွန်းတဲ့ စကားလုံးတွေ ဒါပေမယ့် အစ်မစိတ်ထဲမှာ ကိုယ့်ကိုယ်ကို မင်းသမီးလို့ မသတ်မှတ်ထားပါဘူး။ အဲ့ဒီအချိန်မှာ အစ်မသည် ဒီဆိုင်ရဲ့ပိုင်ရှင် ဒီဆိုင်ရဲ့ ကောင်းတာတွေ၊ ဆိုးတာတွေအတွက် အစ်မမှာ တာဝန်ရှိတယ်။ တာဝန်ယူရမယ် ဆိုတဲ့ အသိပဲ ရှိတယ်။ အဲ့ဒီတော့ ပရိသတ်တွေကလည်း အစ်မနဲ့ ရင်းရင်းနှီးနှီးနွေးနွေးထွေးထွေးရှိတယ်။ သူတို့ အရမ်းအကြာကြီး စောင့်ရတယ်။ အဲ့ဒီအခါကျရင် အစ်မကို ခေါ်ပြောတယ် အစ်မကို ချစ်လို့လာစားတာနော်တဲ့ ကျွန်တော်တို့ တခြားဆိုင်မှာ ဒီလောက် အကြာကြီးစောင့်ရရင် ပြောဆိုပြီးတော့ ပြန်ပြီလို့ပြောတော့ ဝမ်းသာတယ်လေ” လို့ မြတ်ကေသီအောင်က ပြောပါတယ်။

Coffee Lu Gallery ဆိုင်လေးရဲ့ အပြင်အဆင်လေးတွေကလည်း လှသလို၊ လာရောက်အားပေးကြတဲ့ ပရိသတ်တွေကလည်း အရမ်းကို များပြားလွန်းတာကြောင့် တစ်ခါ၊ နှစ်ခါမက ပြန်လွှတ်လိုက်ရတဲ့သူတွေလည်း ရှိတာကြောင့် Duwun Media ကနေတဆင့် တောင်းပန်စကား ဆိုခဲ့ပါသေးတယ်။

” ပြန်လွှတ်ရတဲ့သူတွေလည်း ရှိတယ်။ တချို့ဆို ၂ ခါလာလည်း ၂ ခါပြန်ရတယ်၊ ၃ ခါလာလည်း ၃ ခါပြန်ရတယ်ဆိုတဲ့ ပရိသတ်တွေကိုတော့ အစ်မ ဒီနေရာကနေ တောင်းပန်ပါတယ်။ အစ်မ ဆိုင်လေးက ကျဉ်းတဲ့အတွက် လူတွေကလည်း တအားလာတဲ့အတွက် ဘယ်လိုမှ မျှပေးလို့ မရဘူးပေါ့နော်။ အဲ့ဒါကိုတော့ နည်းနည်းလေး နားလည်ပေးပါ” လို့ သူကဆိုပါတယ်။ မြတ်ကေသီအောင်ဟာ ကိုယ်ပိုင်စီးပွားရေးဘက်မှာ ဦးစီးဆောင်ရွက်နေရသူဖြစ်တာကြောင့် အနုပညာအလုပ်တွေလည်း အရင်ကလောက် အများကြီးမလုပ်ဖြစ်တော့ဘူးလို့ သိရပါတယ်။

အနုပညာလောကမှာ အောင်မြင်မှုတွေအများကြီးရရှိခဲ့ဖူးတဲ့ မြတ်ကေသီအောင်ဟာ အခုချိန်မှာတော့ ကိုယ်ပိုင်စီးပွားရေးကိုဘဲ အဓိကထား ဆောင်ရွက်နေတယ်လို့ သိရပါတယ်။ ၂၀၁၈ ခုနှစ် ဖေဖော်ဝါရီလအတွင်းမှာပဲ သူ့ရဲ့ အသက်က ၄၆ နှစ်ပြည့်ခဲ့ပြီးဖြစ်ပါတယ်။ မြတ်ကေသီအောင် ဟာ  ကြည်လင်အေးမြတဲ့ မျက်နှာလေးနဲ့ ပရိသတ်ရဲ့အချစ်တွေကို ရယူထားတဲ့ အနုပညာရှင် တစ်ယောက် ဖြစ်ပါတယ်။ စိတ်သဘောထား ပြည့်ဝသူ၊ ပွင့်လင်းသူဖြစ်တဲ့သူမဟာ အနုပညာအလုပ်တွေ မလုပ်ဖြစ်တော့ပေမဲ့ အခုထိ ပရိသတ်အားပေးမှုကို ရရှိထားတုန်းပါပဲ။